ملک کے چپے چپے سے دہشتگردی کے مکمل خاتمے تک چین سے نہیں بیٹھیں گے، صادق سنجرانی*

 *ملک کے چپے چپے سے دہشتگردی کے مکمل خاتمے تک چین سے نہیں بیٹھیں گے، صادق سنجرانی*

*کوئٹہ: چیئر مین سینٹ محمد صادق سنجرانی نے نوشکی اور پنجگور میں سیکورٹی فورسز پر ہونے والے حالیہ دہشتگرد حملے کی شدید الفاظ میں مذمت کرتے ہوئے کہا ہے کہ ملک کے چپے چپے سے دہشتگردی کے مکمل خاتمے تک چین سے نہیں بیٹھیں گے،انہوں نے قوم کی جانب سے اس عزم کا اعادہ کیا کہ دہشتگردوں کو کبھی بھی ملک کو غیر مستحکم کرنے کے مذموم مقاصد میں کامیاب نہیں ہونے دیا جائے گا۔ یہ بات انہوں نے اتوار کو دورہ نو شکی کے موقع پر بات چیت کر تے ہوئے کہی۔ اس موقع پر وزیراعلیٰ بلو چستان میر عبد القدوس بزنجو بھی موجود تھے۔ چیئرمین سینیٹ محمد صادق سنجرانی نے کہا کہ پاکستان کے بہادر مسلح اور قانون نافذ کرنے والے اداروں کو خراج تحسین پیش کرتے ہیں جنہوں نے مادر وطن کے دفاع کی خاطر اپنی جانوں کا نذرانہ پیش کیا اور ہماری پوری ہمدردیاں اور دعائیں ان کے خاندانوں کے ساتھ ہیں۔ انہوں نے کہا کہ ان جانثاروں کی قربانیوں کو رائیگا ں نہیں جانے دیا جائے گا۔ بلوچستان کو طویل عرصہ سے دہشتگردی کا سامنا ہے جس کی وجہ سے بلوچستان کی ترقی کا عمل متاثر ہو رہا ہے اور بلوچستان کو خوشحالی سے روکنے کیلئے یہ بزدلانہ کاروائیاں ہیں۔ چیئرمین سینیٹ نے کہا کہ بلوچستان خوشحال ہو گا تو یہ پورے خطے کے لئے ایک طاقت بن کر ابھرے گا۔ انہوں نے کہا کہ دہشتگردوں کے حملوں اور کاروائیوں سے بلوچستان کی خوشحالی اور ترقی کو روکنے نہیں دیا جائے گا۔ دہشتگردی کے خاتمے کیلئے مسلح افواج کے آپریشنز کے واضح نتائج سامنے آ رہے ہیں۔ انہوں نے کہا کہ بلوچستان کے عوام نے اب تک غیر معمولی بہادری اور جوانمردی کا مظاہرہ کیا ہے اور پاکستان کے عوام اور قائدین دہشتگردی کے مکمل خاتمے تک ملک کی سیکورٹی فورسز اور اداروں کے ساتھ کندھے سے کندھا ملا کر کھڑے ہیں۔ چیئرمین سینیٹ نے کہا کہ انشاءاللہ ایک پر امن، خوشحال اور ترقی یافتہ بلوچستان کا خواب جلد حقیقت بن کر رہے گا۔*