مسائل کیوجہ جہالت‘ ہم نے اپنے کل کو آج پر قربان کیا. نوابزادہ حاجی لشکری رئیسانی
*کوئٹہ(بی این سی نیوز بلوچستان)بلوچستان پیس فورم کے سربراہ نوابزادہ حاجی لشکری خان رئیسانی نے کہا ہے کہ وسائل سے مالا مال سرزمین کے وسائل ناخواندہ قوموں کیلئے مسائل کا سبب بنتے ہیں ،جن قوموں نے اپنی ترقی و خوشحالی کیلئے علم حاصل کیا وہ آج دنیا پر حکومت کررہی ہیں اور جن قوموں نے کتاب کو ذریعہ معاش کے ساتھ جوڑا وہ محکومی میں زندگی گزارہی ہیں ، یہ بات انہوں نے منگل کو بلوچستان پیس فورم کے زیراہتمام نوری نصیر خان کلچرل کمپلیکس کی لائبریری کیلئے کتب دینے اور افسران میں تعریفی اسناد تقسیم کرنے کے حوالے سے تقریب سے خطاب کرتے ہوئے کہی ، اس موقع پر ڈائریکٹر نوری نصیر خان کلچرل کمپلیکس دائود ترین ، سابق وفاقی وزیر میر ہمایوں عزیز کرد ، بلوچستان پیس فورم کے وائس چیئرمیں ظفر صدیق سمیت رضا کاروں کی بڑی تعداد موجود تھی ۔نوابزادہ لشکری رئیسانی نے لاعلمی اور جہالت کو بحرانوں اور مسائل کی وجہ قرار دیتے ہوئے کہا کہ ہمیں اپنے وقار اور قومی عظمت کو بلند ، بحرانوں اور جہالت سے نکلنے کیلئے کتاب کے ساتھ اپنے آج اور کل کو جوڑنا ہوگا ۔انہوں نے کہا کہ بحیثیت قوم اپنے مسائل کا حل علم کے ذریعے تلاش کرنے کیلئے زیادہ سے زیادہ وقت کتاب اور لائبریری کو دے کر مطالعہ کو روزمرہ زندگی کا حصہ بنانا ہوگا ۔ انہوں نے کہا کہ بلوچستان میں آج وسائل کا شور تو مچایا جارہا ہے مگر ہماری آنکھوں کے سامنے ساحل اور وسائل لوٹے جارہے ہیں کیونکہ ہم غیر منظم طریقے سے اپنے کل کو آج پر قربان کررہے ہیں جس کی وجہ سے ہمارا آج گزرے ہوئے کل کی طرح اور آنے والے دن بحرانوں اور اندھیروں کا شکار ہوں گے۔*